„Það er rétt Louis, ég er feitur“

Neil Custis, blaðamaður The Sun, hefur svarað fyrir sig eftir að Louis van Gaal, knattspyrnustjóri Manchester United, kallaði hann feitan.

Van Gaal sat fyrir svörum eftir 3-3 jafntefli United gegn Newcastle á þriðjudagskvöldið og líkaði ekki hvernig blaðamenn hafa gagnrýnt liðið, sér í lagi fyrirliðann Wayne Rooney.

„Þið hafið gagnrýnt hann. Ekki ég,“ sagði hann og stóð upp. Þegar hann gekk frá borðinu sneri hann sér við, benti út í sal og sagði: „Þú líka. Feiti maðurinn, þarna.“

Custis svaraði fyrir sig í fréttinni sem hann skrifaði svo um blaðamannafundinn á vef The Sun.

„Það er rétt Louis, ég er feitur. Ég fór í hnéaðgerð fyrir fjórum mánuðum síðan sem gerði það að verkum að ég hef ekki getað hlaupið og farið í ræktina.“

„Ég hef bætt á mig tæpum tólf kílóum. En ég er að reyna að ná því af með því að vera með „þurran“ janúar og „rólegan“ febrúar og með aðstoð einkaþjálfara.“

Van Gaal hefur áður lent saman við blaðamenn og gekk út af blaðamannafundi í síðustu viku eftir að hafa fengið mikla gagnrýni í fjölmiðlum.