Lilja sendir samúðarkveðjur vegna fráfalls Shimon Peres

Lilja Alfreðsdóttir utanríkisráðherra hefur sent ísraelskum stjórnvöldum samúðarskeyti vegna fráfalls Shimon Peres, fyrrverandi forseta Ísrael, sem lést í nótt, 93 ára að aldri.

„Shimon Peres var framúrskarandi stjórnmálamaður sem ávallt horfði fram á veginn. Framlag hans til friðar og sátta mun aldrei gleymast," sagði Lilja í skeytinu.

Peres gengdi embætti forsætisráðherra Ísraels á árunum 1984 til 1986 og svo aftur 1995 til 1996 og svo embætti forseta á árunum 2007 til 2014.

Hann fékk Friðarverðlaun Nóbels árið 1994, ásamt þeim Yitzhak Rabin, þáverandi forsætisráðherra Ísraela, og Yasser Arafat, leiðtoga Palestínumanna, fyrir þátttöku sína í friðarviðræðum Ísraela og Palestínumanna. Peres gegndi á þessum tíma embætti utanríkisráðherra Ísraels.