Feðgar sömdu jólalag um flóttamannavandann

Feðgarnir Davíð Baldursson og Þorvaldur Örn Davíðsson tóku höndum saman á aðventunni og sömdu lagið Hugleiðing á jólum, en textinn snýr nær einvörðungu að flóttamannavandanum.

„Já, það vildi þannig til að faðir minn orti þennan texta og sendi á mig. Þar sem hann er frábrugðinn öðrum jólatextum og á einstaklega vel við í dag fannst mér ég þurfa að gera eitthvað við hann,“ segir Þorvaldur Örn í samtali við Vísi.

Textinn fjallar um flóttamannavandann og segir Þorvaldur að tilgangurinn hafi verið að fjalla um raunveruleikann frekar en glysið sem jólin vilji oft vera.

„Hugmyndin var semsagt að gera jólalag sem á erindi við samtímann, til að minna okkur á að gera vel við þá sem njóta ekki sömu forréttinda og við. Síðan er áhugavert að horfa á flóttamannavandann út frá jólaguðspjallinu,“ segir Þorvaldur en í textanum má einmitt finna línuna „Enginn Kristi vildi veita vild í hinni helgu borg.”

Hlusta má á lagið í spilaranum hér að neðan, en Þorvaldur smalaði vinum sínum saman í kór og Steinar Logi Helgason er stjórnandi.

Hugleiðing á jólum:

Sveipar veröld voði, ótti,

ógnir myrkurs herja á.

Friðlaus hjörtu, flærð og þótti,

fólska og hatur marga hrjá.

Þrálát eru manna meinin,

miskun víða fágæt gjöf.

Sár nú heyrast sorgarveinin,

sandur þekur fjöldagröf.

Athvarf barni brýnt að leita,

bágu kjörin vekja sorg.

Enginn Kristi vildi veita

vild í hinni helgu borg.

Eru jólin gleymd og grafin,

glysið snauða, hljómið eitt,

langt frá stalli hátt upp hafin,

hátíð sem ei gefur neitt?

Kærleikshöndin bölið bætir

brýnan vanda leysa þarf.

Vægðin flóttamönnum mætir

mildi, festa, líknarstarf.

Athvarf barni brýnt að leita,

bágu kjörin vekja sorg.

Enginn Kristi vildi veita

vild í hinni helgu borg.