Giggs efstur á blaði hjá veðbönkum

Samkvæmt veðbönkum er Ryan Giggs líklegastur til að taka við starfi knattspyrnustjóra Swansea City sem íslenski landsliðsmaðurinn Gylfi Þór Sigurðsson leikur með.

Velska liðið er í stjóraleit eftir að það rak Bandaríkjamanninn Bob Bradley í kvöld. Hann skilur við Swansea í nítjánda og næstneðsta sæti ensku úrvalsdeildarinnar.

Walesverjinn Giggs var sterklega orðaður við Swansea eftir að Francesco Guidolin var rekinn í haust. Bradley fékk hins vegar starfið en entist aðeins í því í 85 daga.

Alan Pardew kemur næstur á blaði en hann fékk sparkið hjá Crystal Palace á fimmtudaginn í síðustu viku.

Gary Rowett, fyrrum stjóri Birmingham City, og Chris Coleman, þjálfari velska landsliðsins, hafa einnig verið nefndir til sögunnar sem mögulegir eftirmenn Bradleys.