Titilvörn Katrínar Tönju fer ekki fram í Kaliforníu næsta sumar

Heimsleikarnir í crossfit munu fara fram á nýjum stað næsta sumar en þeir hafa farið fram í Carson í Kaliforníu undanfarin sjö ár. Mótshaldarar tilkynntu um breytingu á staðsetningu mótsins á lokamóti crossfit tímabilsins.

Næstu þrjú árin munu hraustasta fólkið keppa um titilinn í Alliant Energy Center í Madison í Wisconsin.

Hitinn hefur verið mikill þegar heimsleikarnir hafa farið fram í Kaliforníu undanfarin sjö ár en leikarnir fara fram í júlímánuði. Madison er mun norðar í Bandaríkjunum en það er þó ekkert víst að þetta þýði að það verði ekki eins heitt.

Heimsleikarnir í crossfit fóru fram í Carson í Kaliforníu frá 2010 til 2016 og á þessum sjö árum stóð íslensks crossfit-kona fjórum sinnum efst á palli.

Katrín Tanja Davíðsdóttir hefur unnið undanfarin tvö ár en Annie Mist Þórisdóttir vann keppnina 2011 og 2012.

Það eru bara þrjár aðrar konur sem náðu að vinna Heimsleikana á meðan þeir voru haldnir í Carson í Kaliforníu en engin þeirra vann þá oftar en einu sinni.

Titilvörn Katrínar Tönju Davíðsdóttur fer því fram í Wisconsin-fylki næsta sumar en þar getur hún orðið fyrsta konan til að vinna þrjú ár í röð.

Annie Mist var sumarið 2013 í sömu stöðu og Katrín Tanja verður næsta sumar. Annie Mist meiddist í undankeppninni og gat ekki verið meira með.

Katrín Tanja fær væntanlega mikla keppni á næsta ári og það má búast við því að landa hennar Ragnheiður Sara Sigmundsdóttir, sem hefur endaði 3. sæti tvö ár í röð, geri enn á ný atlögu að titlinum.

Það verður líka ein breyting á aldursflokkunum því nú bætist við flokkurinn 35 til 39 ára. Hingað til hafa aldursflokkarnir aðeins verið fyrir 40 ára og eldri og svo 17 ára og yngri.