Bæjarstjórinn í Garðabæ fær afsökunarbeiðni frá Rauða Krossinum

Rauði krossinn í Reykjavík hefur beðið Gunnar Einarsson, bæjarstjóra í Garðabæ, afsökunar á staðhæfingu sem kom fram í skýrslu þeirra um athugun á högum lakast settu borgarbúanna. Þar er haft eftir ónafngreindum viðmælanda að Garðabær eigi íbúðir í Reykjavík sem séu lánaðar fólki svo það fái heimilisfesti í Reykjavík fremur en í Garðabæ.

Gunnar vísaði þessum fullyrðingum sem fram komu í skýrslunni á bug. Sagði hann Garðabæ ekki vera eiganda neinna íbúða í Reykjavík sem notaðar væru í slíkum tilgangi. Krafði hann Rauða krossinn í kjölfarið um afsökunarbeiðni vegna þessa en Rauði krossinn hefur nú stígið fram og sagt að þessar upplýsingar hafi verið rangar og að þær verði leiðréttar.

Skýrsla Rauða Krossins ber yfirskriftina „Fólkið í skugganum“ en hún var gerð til að kortleggja aðstæður fátæks fólks í Reykjavík í þeim tilgangi að geta betur brugðist við vanda þeirra.