Leiðtogarnir slaka á eftir baráttuna: Bjarni konditor, sveitin og hljómsveitaræfingar

Það er misjafnt hvað leiðtogar stjórnmálaflokkanna sem náðu sæti á þing ætla að gera til að slaka á eftir strembna og snarpa kosningabaráttu. Leiðtogarnir mættu í viðtal til Heimis Más Péturssonar, fréttamanns Stöðvar 2, í hádegisfréttum.

Sigurður Ingi Jóhannesson forsætisráðherra fer á fund Forseta seinna í dag og biður lausnar fyrir sig og ríkisstjórn sína. Hann segist þó vilja komast eitthvað heim í sveitina. „Ætli ég reyni ekki að skjótast austur,“ sagði Sigurður Ingi í hádegisfréttum Stöðvar 2. Hann segist vilja komast í hesthús og labba um í náttúrunni.

„Það eru verkefni framundan og við þurfum að starfa sem starfstjórn. Svo er verkefni að koma saman ríkisstjórn sem fyrst.“

Björn Leví Gunnarsson, nýkjörinn þingmaður og fulltrúi Pírata í þættinum, virtist hafa lítinn tíma til að slaka á. „Frítíma?“ sagði hann hvumsi við fyrirspurn Heimis Más Péturssonar, fréttamanns Stöðvar 2. „Það verður nóg að gera,“ sagði Björn en stjórnarmyndunarviðræður virtust vera honum ofarlega í huga. 

Bjarni konditor

Því næst spurði Heimir Már hvað Bjarni Benediktsson hygðist gera. „Þú ert nú þekktur fyrir kökubakstur,“ sagði Heimir. 

„Ég hef verið að segja við menn að þetta hafi gengið of langt. Ég er meiri kökuskreytingamaður,“ svaraði Bjarni

„Já svona konditor“ skaut Heimir þá inn í og vakti lukku viðstaddra.

„Þú losnar aldrei við þetta, Bjarni kondítor!“ sagði Katrin Jakobsdóttir, formaður Vinstri grænna.

Kökuskreytingar virðast þó ekki vera á dagskrá Bjarna í dag, en hann sagðist stefna á að taka til í bílskúrnum heima hjá sér.

Sjálf sagðist Katrín hlakka mest til að hitta syni sína. „Þeim fannst árangurinn ekki nógu góður. Þeim fannst ég eiga að fá milljón atkvæði miðað við hvað ég er búin að vera mikið í burtu,“ sagði Katrín.

Fjölskylduboð og hljómsveitaræfingar

Benedikt Jóhannesson sagðist myndu fagna góðum árangri með fjölskyldu sinni og spurði Bjarni þá hvort stórfjölskyldunni yrði boðið, en þeir Benedikt eru frændur. 

Óttarr Proppé, formaður Bjartrar Framtíðar hafði frumlegustu áformin. Hann ætli fyrst að hitta félaga sína í þingflokki Bjartrar Framtíðar, en svo fer hann á fullt í hljómsveitaræfingum. 

„Það er búið að bóka svolítið af tónleikum. Airwaves er í næstu viku þannig að ég er líklega á leið á rokkæfingu í kvöld,“ sagði Óttarr.