Óttarr um græna jakkann: „Guli rekkinn inni í skáp orðinn þreyttur og skítugur“

„Ég gerði mér bara ekki grein fyrir því að ég væri kominn með sálarheill landans svona mikið í fangið,“ segir Óttarr Proppé, formaður Bjartrar framtíðar, í samtali við Vísi.

Fötin sem Óttarr klæddist í umræðuþætti RÚV með formönnum þeirra flokka sem náðu mönnum inn á þing í gærkvöldi vöktu mikla athygli á samfélagsmiðlinum Twitter, og virtist fólk jafnvel vera í uppnámi.

„Þetta kemur eiginlega bara til útaf því að guli rekkinn inni í fataskápnum mínum var orðinn nokkuð þreyttur og skítugur eftir langa kosningabaráttu og maður þurfti að teygja sig djúpt inn í skápinn.“

Klæðaburður Óttars hefur lengi vakið athygli og voru karrígul jakkaföt hans og rauður rúllukragabolur sem hann klæddist mikið í kosningabaráttunni mikið til umræðu á kaffistofum landsmanna og mannamótum. Í dag mætti Óttarr á fund til Guðna Th. forseta Íslands til að ræða mögulega stjórnarmyndun. Þá mætti Óttarr í græna jakkanum sem hann var í á RÚV í gærkvöldi en var í gömlu góðu karrígulu buxunum og karrígulu vesti. Hann var einnig í vínrauðri rúllukragapeysu.

„Maður er kannski farinn að horfa á fjölbreyttari klæðnað í dag. Ég hef svosem látið sjá mig í öðru, þó svo að ég forðist grá jakkaföt og bindi. Fólk má alveg reikna með því að ég láti sjá mig í einhverju öðru í framtíðinni. Þessi græni jakki er einn af mínum uppáhalds og ég hafði ekki farið í hann í mörg ár.“

Sumir hafa velt því fyrir sér hvort græni jakkinn hafi verið einhver skilaboð til VG eða jafnvel Framsóknarflokksins, en þar er græni liturinn áberandi. „Mér finnst allavega mjög viðeigandi að vera í þessum jakka, þar sem Björt Framtíð er mjög grænn flokkur og við leggjum mikla áherslu á umhverfismálin.“