Átök er brotist var inn til Miröndu Kerr

Lögregla var kölluð til heimilis Miröndu Kerr í Los Angeles í nótt eftir að innbrotsþjófur braust inn á heimili hennar. Öryggisvörður er sagður hafa skotið innbrotsþjófinn í hausinn, sjálfur varð hann fyrir stungusárum í átökum á milli þeirra.

Fyrirsætan, sem best er þekkt fyrir störf sín með Victoria's Secret, var ekki heima þegar innbrotið átti sér stað, að sögn lögreglu. Er þetta í annað sinn á skömmum tíma sem lögregla er kölluð að heimili Kerr vegna innbrotsþjófs.

Innbrotsþjófurinn er ekki sagður vera í lífshættu þó sár hans séu alvarleg. Öryggisvörðurinn var einnig fluttur á sjúkrahús og er ástand hans sagt stöðugt.