Ótrúlegt flugslys náðist á myndband

Flugmaðurinn Thom Richard getur prísað sig sælan með að sleppa án teljandi meiðsla eftir að flugvél hans bilaði í upphafi flugvélakeppni í Bandaríkjunum á dögunum. Komst hann ekki af stað og þrátt fyrir merki um að bilun hefði átt sér stað fékk hann flugvélina fyrir aftan beint á sig.

Keppnin var þannig skipulögð að margar flugvélar leggja af stað af á sömu flugbrautinni í einu af mismunandi stöðum. Lítið má því út af bregða í flugtakinu en komi eitthvað upp á eiga flugmenn að gefa merki til skipuleggjanda sem setja upp flagg sem lætur aðra flugmenn vita að búið sé að hætta við flugtak.

Á myndbandinu sést Thom gefa þess konar merki en svo virðist sem að flugmaðurinn fyrir aftan hafi ekki séð flaggið sem kom upp í kjölfarið. Lendir hann því beint aftan á flugvél Thom. Líkt og sjá má á myndbandinu hér fyrir neðan má afar litlu muna að mjög illa fari en vængur flugvélarinnar er aðeins millimetrum frá hausamótunum á Thom.

Hann slapp sem betur fer með minniháttar meiðsl á hendi en báðar flugvélarnar skemmdust mikið enda var höggið mikið líkt og sjá má á myndbandinu hér að neðan.