Frábær sigur Atlético á Bayern | Sjáðu markið

Atlético gerði sér lítið fyrir og vann Þýskalandsmeistara Bayern München, 1-0, á heimavelli sínum í Madríd í kvöld.

Eina mark leiksins skoraði Belginn Yannick Carrasco sem hefur fengið stærra hlutverk í liði Diego Simeone á þessari leiktíð og hann þakkaði traustið í kvöld.

Carrasco skoraði með fallegu og föstu skoti á 35. mínútu en boltinn fór í stöngina og inn, óverjandi fyrir Manuel Neuer í marki Bayern.

Bayern sótti nokkuð stíft í seinni hálfleik og fékk ágæt færi en tókst ekki að skora gegn skipulögðu og sterku liði Atlético.

Atlético fékk besta færi seinni hálfleiksins þegar Felipe Luis var felldur í teignum af Arturo Vidal og vítaspyrna dæmd. Antoine Griezmann fór á punktinn en skaut í slána.

Heimamenn héldu út og unnu, 1-0, en með sigrinum komst Atlético á toppinn í riðlinum. Spænska liðið er með sex stig eftir tvo leiki en Bayern er í öðru sæti með þrjú stig.

Yannick Carrasco skorar sigurmark Atlético: