Skora á Alþingi að fella niður toll á frönskum kartöflum

Dómur féll í Héraðsdómi Reykjavíkur í dag í máli tveggja innflutningsfyrirtækja gegn íslenska ríkinu. Þar hafnaði Héraðsdómur kröfu tveggja innflutningsfyrirtækja um að 76% tollur, sem lagður er á innfluttar franskar kartöflur, yrði dæmdur ólögmætur og endurgreiddur. Dómurinn féllst á þau rök íslenska ríkisins í málinu að tollurinn væri ætlaður til almennrar tekjuöflunar, en ekki til að vernda innlenda framleiðslu.

„Þetta mál er einkennilega vaxið. Ríkisstjórnin hefur beitt sér fyrir því að allir tollar á innfluttar vörur verði felldir niður, nema tollar á sumar matvörur. Þau rök hafa verið færð fyrir því að halda verði tollum á þeim vörum að það sé nauðsynleg til að verna innlendan landbúnað. Svo koma fulltrúar sömu ríkisstjórnar ítrekað fyrir dómstóla og halda því fram að ofurtollar á einstakar matvörur séu til tekjuöflunar en ekki verndartollar – og dómstólar fallast á þessa röksemdafærslu,“ segir Ólafur Stephensen, framkvæmdarstjóri Félags atvinnurekanda í kjölfar niðurstöðu Héraðsdóms Reykjavíkur.

Snakkframleiðendur litu á tollinn sem verndartoll

Dómurinn er í samræmi við dóm Hæstaréttar í máli innflutningsfyrirtækja gegn ríkinu vegna ofurtolls á innflutt snakk en Ólafur segir að það mál sé mjög svipað vaxið og þetta. Þann toll hefur Alþingi nú ákveðið að fella niður frá og með næstu áramótum og vill Félag atvinnurekanda sjá að eins verði fari að með toll á frönskum kartöflum.  

„Ríkið hélt því fram að sá tollur væri bara tekjuöflunartollur. Það var hins vegar mjög greinilegt af viðbrögðum innlendra snakkframleiðanda að þeir litu á tollinn sem verndartoll. Alþingi tók rétta ákvörðun um að fella niður gerræðislega skattheimtu á eina vöru. Við hvetjum þingið til að gera slíkt hið sama með tollinn á frönsku kartöflurnar.“