Grænt ljós komið á umdeilt kjarnorkuver í Bretlandi

Ríkisstjórn Bretlands hefur gefið grænt ljós á byggingu fyrsta kjarnorkuvers landsins í tuttugu ár. Verkefnið var stöðvað fyrir nokkrum mánuðum þegar Theresa May varð forsætisráðherra vegna ótta um þjóðaröryggi Bretlands. Bygging kjarnorkuversins er fjármögnuð af ríkisreknum fyrirtækjum frá Frakklandi og Kína.

Heildarkostnaður verkefnisins er talin vera um 18 milljarðar punda, sem samsvarar um 2.700 milljörðum króna. Kjarnorkuverið verður byggt á Hinkleyhöfða í suðurhluta Englands.

Græna ljósinu fylgja þó nokkrir skilmálar. Þeir fela í sér takmarkanir að franska fyrirtækið EDF verði að vera meirihlutaeigandi á meðan bygging versins stendur yfir. Vilji fyrirtækið selja hlut sinn eftir það getur ríkisstjórn Bretlands gripið inn í.

Gagnrýnendur verkefnisins hafa sett út á að erlend yfirvöld komi að byggingu kjarnorkuvers í Bretlandi og þá sérstaklega kínversk. Þá hafa einnig vaknað spurningar um kostnað rafmagns frá verinu en hann er talinn vera nokkuð hár.

Þá felur verkefnið í sér að Kínverjar fái að reisa annað kjarnorkuver í Essex.

Samkvæmt ríkisstjórn Bretlands mun byggingin skapa 26 þúsund ný störf og og sjá um um það bil sjö prósent af orkuþörf Bretlands í 60 ár.

5 key questions about the development of a giant new UK nuclear power station https://t.co/mfc7TTp9y4 #Hinkley pic.twitter.com/KPK7orhhDN

— AFP news agency (@AFP) September 15, 2016