Grunaður hryðjuverkamaður skotinn til bana í Kanada

24 ára gamall Kanadamaður sem grunaður var um að ætla sér að fremja hryðjuverk var skotinn til bana í Kanada í nótt. Var hann grunaður um að ætla að sprengja sjálfan sig í loft upp á almannafæri.

Fyrir um ári síðan var maðurinn handtekinn fyrir að lýsa yfir stuðningi við hryðjuverkasamtökin ISIS á samfélagsmiðlum. Bjó maðurinn í Ontario-héraði, um 225 kílómetrum frá Toronto. Fylgdist lögregla grannt með honum og þegar hún komst á snoðir um að maðurinn ætlaði sér að útbúa sprengju var gripið til aðgerða.

Greina fjölmiðlar í Kanada frá því að þegar lögregla mætti á heimili mannsins hafi hann sprengt litla sprengju og sært sjálfan sig. Hafi hann ætlað sér að sprengja aðra sprengju þegar lögregla nálgaðist hann og því var hann skotinn af lögreglumönnum.