iPhone 7 eigendur reyna að bora tengi fyrir heyrnartól á símann sinn

Kennslumyndband sem sýnir hvernig bora á heyrnartólatengi á iPhone 7 hefur orðið til þess að fjölmargir iPhone eigendur þurfa nú líklegast að fjárfesta í nýjum síma.

Ástæðan er sú að myndbandið er blekking enda er að öllum líkindum ómögulegt að búa til tengi á síma með því einfaldlega að bora í hann. Fjölmargir virðast þó hafa fallið fyrir hrekknum. 

iPhone 7 kom á markað fyrir skemmstu en síminn er sá fyrsti sinnar tegundar sem hefur ekkert tengi fyrir heyrnartól. Þess í stað fylgja þráðlaus heyrnartól með símanum. Margir af notendum símans eru lítt hrifnir af þessum eiginleika og sakna þess að geta notað sín eigin heyrnartól í stað þeirra þráðlausu.

Vart þarf að taka fram að símar þeirra sem reyndu þetta eyðilögðust. Sumir hafa lýst gremju sinni í athugasemdum við myndbandið en aðrir gera óspart grín að þeim sem féllu í gildruna.