Tengja íslenska og pólska listamenn

„Þetta er fyrsta skiptið sem þetta er haldið. Böndin spila hérna heima á Menningarnótt og síðan tveimur vikum seinna spila þau úti í Póllandi. Þetta verður með mun stærra sniði þarna úti, það verður „showcase“ til að kynna listamennina og útvarpsútsending og fleira í kringum tónleikana þar,“ segir Pan Thorarensen, einn af skipuleggjendum hátíðarinnar hérna heima. Sjálfur verður Pan að spila á tónleikunum undir nafninu Beatmakin Troopa en hann er líka einn meðlimur raftríósins Sterio Hypnosis.

Þessi hátíð er að mestu skipulögð af Chimes Agency, pólskri PR- og umboðsskrifstofu sem er nokkuð stórtæk í heimalandi sínu. Þar ráða lögum og lofum þær Magdalena Jensen, stofnandi fyrirtækisins, Ania Kasperek, sem hefur haft mikil tengsl við Ísland og Skandinavíu, og Magda Cholyst.

„Þær eru svolítið stórar úti, þær eru búnar að vera að stússast í þessum bransa lengi og eru helvíti öflugar. Þær hafa séð um að bóka næstum öll íslensk bönd sem hafa spilað í Póllandi. Hugmyndin með hátíðinni er að styrkja betur sambandið milli Íslands og Póllands í tónlist sem og öðrum listum,“ segir Pan, en hann segir að þó nokkur eftirspurn sé eftir íslenskri tónlist í Póllandi og markaðurinn þar sé auðvitað töluvert stærri en hér á landi.

Á New Neighbourhoods koma fram íslensku sveitirnar Tonik Ensemble, Beatmakin Troopa og Úlfur Úlfur. Þarna koma líka fram nokkrar pólskar hljómsveitir. Hatti Vatti er raftónlistarmaður sem hefur meðal annars tekið upp plötu í stúdí­ói Ólafs Arnalds, þannig að hann hefur tengingu við landið. Baasch er annar raftónlistarmaður frá Póllandi sem hefur gert það gott þar í landi þar sem hann hefur séð um kvikmyndatónlist og einnig starfað með mörgum þekktum böndum þar í landi. The Stubs er pönkhljómsveit frá Varsjá sem byrjaði feril sinn í greni þar í borg og hefur núna spilað hér og þar í Evrópu og ku vera ein vonarstjarna pólskrar tónlistar – hljómsveitin var til dæmis tilnefnd til Evrópuverðlauna MTV-sjónvarpsstöðvarinnar árið 2012 en hefur þrátt fyrir frægðina tekist að halda í pönkrætur sínar. Auk þessara hljómsveita munu listamennirnir Guðmann Þór Bjargmundsson og Stanislaw Zaleski sjá um sjónræna skemmtun fyrir gesti hátíðarinnar.

New Neighbourhoods Festival verður haldin í fyrsta skiptið á Kex hosteli á Menningarnótt frá klukkan hálf þrjú og fram á kvöld. Frítt er inn á hátíðina. 10. september verður svo sama dagskráin flutt í Póllandi, nánar til tekið í Varsjá, og þar mun hún fara fram á Plac Defilad torginu sem er eitt það stærsta í heiminum.