„Skömmumst okkar fyrir ákveðna hluti á Þjóðhátíð og við viljum bæta okkur“

„Við tókum frá tjaldstæði á miðvikudag og fimmtudaginn fór allur í það að koma dúknum upp og húsgögnunum inn,“ segir Elliði Vignisson, bæjarstjórinn í Vestmannaeyjum þegar hann bauð fréttamanni í heimsókn.

Þjóðhátíð í Vestmannaeyjum fór fram um helgina og þótti hátíðin heppnast nokkuð vel. Sólin skein á gesti Þjóðhátíðar alla helgina og mikið stuð í dalnum um öll kvöld. Vísir og Stöð 2 var á svæðinu og fylgdist vel með.

„Við erum sennilega búin að vera undirbúa tjaldið í sennilega tvær vikur. Það þarf að baka og við erum með allskonar múnderingar og við fjölskyldan erum með matarhefðir í allar áttir.“

Gömul húsgögn notuð á hverju ári

Elliði segir að húsgögnin sem fjölskyldan notar í tjaldinu séu gömul og séu notuð frá ári til árs.

„Flest húsgögnin eru svona 15-20 ára og sum þeirra sextíu ára. Það er ákveðin taktur í þessu öllu saman. Það er svona fjölskyldustemning hérna í dalnum til miðmætis. Þá förum við Eyjamenn heim með börnin og komum aftur í dalinn og töku hraustlega á því,“ segir Elliði en í hans tjaldi eru ávallt þrír menn með kassagítar. Veðrið um þessa verslunarmannahelgi var ótrúlegt í Vestmannaeyjum.

„Veðrið er alltaf ákveðið happadrætti. Þjóðhátíðin verður alltaf langtum auðveldari þegar veðrið er svona en það sem við gerum fyrir hverja einustu þjóðhátíð er að við undirbúum okkur fyrir það versta og svo vonum við það besta. Við erum á öllum tímum undirbúin að taka á móti stórviðri eins og við höfum stundum lent í. Það er ekki sjálfgefið að koma fjögur til fimm þúsund manns í gistingu á tveimur klukkutímum.“

Besta Þjóðhátíðin í sögunni

Elliði var viss um að þessi Þjóðhátíð yrði sú besta í sögunni.

„Straumurinn liggur hingað og veðrið er gott og mér finnst líka eins og fólk hafi tekið höndum saman um það, kannski eftir erfiða umræðu í aðdraganda Þjóðhátíðar, að gera allt sem við getum til að þess að standa undir þessari ábyrgð sem okkur er sýnd. Þetta er gömul hátíð og hún er rík af hefðum. Okkur þykir ofboðslega vænt um hana og alltaf tilbúin að leggja mikið á okkur til að þetta takist vel. Þegar umræðan hefur verið eins og hún hefur verið og við skömmumst okkar fyrir ákveðna hluti á Þjóðhátíð og við viljum bæta okkur alveg stöðugt. Með þennan vilja að vopni þá hef ég trú á að þessi Þjóðhátíð verði sú besta,“ segir Elliði en í tilkynningu frá lögreglunni í Vestmannaeyjum kemur fram að eitt kynferðisbrot hafi verið kært á hátíðinni um helgina.

„Ofbeldisbrot mega aldrei viðgangast. Við sem þjóð getum aldrei umborið það að núna þegar árið er rétt hálfnað að 88 manns séu búin að leita á neyðarmóttöku Landspítalans. Við sem þjóð, 330.000 manna friðelskandi þjóð, við getum ekki umborið þetta. Ef Þjóðhátíð og Vestmannaeyjar geta verið flaggskip í þessari baráttu þá skal ekki standa á því,“ sagði Elliði á föstudagskvöldið.