„Við viljum engan helvítis bleikan fíl í dalinn“

„Við erum sjö til átta vinkonur sem ákváðum að vera ruðningslið með lukkudýri,“ segir Sara Hlín Sölvadóttir, sem mætti í skemmtilegum búningi í Herjólfsdal ásamt vinkonum sínu en árlega er búningakeppni í Herjólfsdal og mæta margir vinahópar í allskonar búningum á Þjóðhátíð.

Þjóðhátíð í Vestmannaeyjum fór fram um helgina og þótti hátíðin heppnast nokkuð vel. Sólin skein á gesti Þjóðhátíðar alla helgina og mikið stuð í dalnum um öll kvöld. Vísir og Stöð 2 var á svæðinu og fylgdist vel með.

„Við heitum The Great White´s og okkar mottó er bara að við viljum engan helvítis bleikan fíl í dalinn. Við viljum ekki sjá bleikan fíl í dalnum í ár. Við stöndum öll fyrir því sama.“

Hér að ofan má sjá viðtalið við Söru og einnig þegar stelpurnar tóku einkennislag hópsins.

„Við vorum í mjög góðum búningum í fyrra og þurftum að finna eitthvað sem væri svona sambærilegt,“ segir Ævar Örn Kristinsson en hann var í Herjólfsdal á samt vinum sínum og allir voru þeir klæddir eins og Jesús Kristur.

„Við erum hér til þess að frelsa mannkynið með blóði Krists og líkama Krists,“ sagði Ólafur Freyr Ólafsson heldur hress í brekkunni á föstudagskvöldið.

„Við unnum búningakeppnina í fyrra og þá vorum við Jókerinn úr Batman þá,“ sagði Árni Þorleifsson en strákarnir ætluðu sér alla leið í ár.

Hér að neðan má sjá stórskemmtilegt viðtal við þessa menn.