Íslenskir safnarar í sjokki eftir svik þekkts uppboðshaldara

„Þetta er mikið sjokk fyrir alla hérna heima,“ segir Magni Magnússon, safnari og fyrrverandi verslunarrekandi.

Einn virtasti uppboðshaldari Danmerkur, sem hefur stundað mikil viðskipti við Íslendinga, bíður nú dóms fyrir að reyna að selja falsaða styttu af Hugsuðinum eftir Auguste Rodin. Hann var sakfelldur í fyrra fyrir peningaþvætti fyrir danskan eiturlyfjahring.

Thomas Høi­land var kóngurinn í viðskiptum með frímerki og seðla í Danmörku sem yfirmaður þeirrar deildar hjá uppboðshúsinu Bruun Rasmussen. Áður hafði hann rekið sitt eigið uppboðsfyrirtæki og í báðum tilfellum átti hann mikil viðskipti við íslenska safnara og áhugamenn um frímerki, mynt og seðla.

„Þetta var bráðskemmtilegur og flinkur náungi. Hann auglýsti mikið í Morgunblaðinu og tók á móti efni á uppboðin. Hér á landi hafði hann einnig aðstoðarmenn,“ segir Magni sem kynntist Thomasi­ fyrst fyrir mörgum áratugum. Þá rak Thomas litla safnarabúð á Vesterbrogade í Kaupmannahöfn.

Danska dagblaðið Politiken hefur fylgst rækilega með máli Thom­asar síðan það kom upp vegna peningaþvættisins. 

Sandra Brovall, blaðakona Poli­tiken, lýsir í greinum sínum nærri farsakenndri atburðarás og því hvernig Thomas notaði uppboðshúsið sitt til að þvætta að minnsta kosti nærri sextíu milljónir íslenskra króna fyrir sjálenskan eiturlyfjahring sem flutti inn fíkniefni frá Suður-Evrópu. Þvættið fór meðal annars fram með falskri sölu á frímerkjasafni, sem líklega var aldrei til.

Dómsmálið sem nú stendur yfir gerir endanlega út af við feril Thom­asar. Hann er sagður hafa látið meta uppruna styttunnar og komist að því að hún væri fölsuð. Þrátt fyrir það hafi hann reynt að selja breska uppboðshúsinu Christie’s styttuna á fjórar til sex milljónir danskra króna, eða ríflega hundrað milljónir íslenskra króna.

„Þeir Íslendingar sem skiptu við hann voru held ég allir ánægðir. Það sem ég skipti við hann var allt í orden, eins og maður segir,“ segir Magni.

Magni lýsir Thomasi engu að síður sem glaumgosa. „Hann var mikill veislumaður, hélt stór uppboð og hafði dinner á eftir. Á uppboðum var alltaf morgunmatur fyrir alla sem komu. Hann var dálítill playboy, eins og maður segir, og átti stóra höll í Málmey sem hann bjó í með seinni konunni sinni.“

Málið sé áfall fyrir íslenska safnara. „Ég held að hann hafi ekki áttað sig á því hvað hann lifði hátt og hratt.“ 



Fréttin birtist fyrst í Fréttablaðinu 1. júlí 2016