Víkurmálið sent aftur til lögreglu frá héraðssaksóknara

Nokkur atriði í rannsókn á meintu vinnumansali í Vík í Mýrdal er varða fjármunabrot þarf að kanna betur að mati héraðssaksóknara. Málið var því sent aftur til lögreglunnar á Suðurlandi.

Mansalsmálið kom upp um miðjan febrúar þegar lögregla fann tvær konur frá Srí Lanka í kjallara húss í Vík í Mýrdal. Í kjölfarið var maður grunaður um að hafa haldið konum í vinnuþrælkun. Maðurinn er eigandi fyrirtækisins Vonta International og sætir farbanni í dag.

Fréttablaðið greindi frá málinu í vor og því að maðurinn sem er grunaður um mansal hefði fengið fólk til landsins frá Srí Lanka til að vinna fyrir sig. Maður frá Srí Lanka sem Fréttablaðið ræddi við greindi til að mynda frá því að honum hefði verið boðin vinna hjá fyrirtækinu gegn greiðslu. Maðurinn átti að greiða tæpa milljón íslenskra króna fyrir starfið.

Aðeins einn ársreikningur er til um rekstur Vonta International. Hann er frá rekstrarárinu 2014. Þá tapaði félagið 395.591 krónu. Laun og launatengd gjöld námu 2.562.147 krónum og annar rekstrarkostnaður nam 938.337 krónum. Kostnaður vegna seldra vara nam 1.014.564 krónum.

„Það voru atriði í rannsókninni sem þarf að skoða betur, þau snúa að meintum fjármunabrotum,“ segir Þorgrímur Óli Sigurðsson, aðstoðaryfirlögregluþjónn á Suðurlandi. „Framhaldsrannsóknin er í algjörum forgangi hjá okkur núna, héraðssaksóknara vantar frekari gögn sem snúa beint að þessum hlutum, við ætlum að treysta undirstöðurnar er viðkemur þessum meintu brotum,“ segir hann.

Þorgrímur Óli segir lögregluna bíða úrvinnslu gagna frá fjármunabrotadeild lögreglunnar á höfuðborgarsvæðinu. „Það þarf svo að bera ýmis atriði undir vitni, við trúum að þetta muni ganga ágætlega og muni ekki taka langan tíma,“ segir hann um framvinduna áður en málið verður sent aftur til ákæruvaldsins.

Rannsóknin þótti ganga vel að öðru leyti. Hildur Dungal, lögfræðingur hjá innanríkisráðuneytinu, sem fer fyrir þverfaglegum stýrihópi gegn mansali hefur sagt að lögregla þurfi að rannsaka mansalsmál á breiðari grundvelli. „Lögregla og ákæruvald getur ekki eingöngu byggt á framburði þolenda. Það þarf að leita leiða til að rannsaka málin á breiðari grundvelli. Þá eru meiri líkur á sakfellingu,“ sagði Hildur aðspurð um áskoranir í málaflokknum með tilliti til íslenskra hegningarlaga.