Auglýst eftir aukaleikurum í Fanga

Framleiðendur sjónvarpsþáttanna Fangar sem nú eru í tökum leita nú að aukaleikurum í ýmiss konar smáhlutverk í þáttunum. Tökur á Föngum eru hálfnaðar en leikstjóri þeirra er Ragnar Bragason sem skrifar einnig handritið ásamt Margréti Örnólfsdóttur.

Það vantar aukaleikara á öllum aldri og af báðum kynjum og eru áhugasamir hvattir til þess að senda tölvupóst á aukaleikarar@mystery.is. Beðið er um að senda póst með nafni, símanúmeri og mynd. Haft verður samband til baka til allra þeirra sem senda tölvupóst.

Samfélagsdrama með áherslu á konur

Með helstu hlutverk í Föngum fara Nína Dögg Filippusdóttir, Unnur Ösp Stefánsdóttir, Þorbjörg Helga Dýrfjörð og Halldóra Geirharðsdóttir.

Aðrir leikarar í þáttunum verða Steinunn Ólína og Kristbjörg Kjeld svo einhverjir séu nefndir.

Sagan segir frá Lindu en hún endar í kvennafangelsinu í Kópavogi eftir að hafa verið dæmd fyrir líkamsárás á föður sinn sem er þekktur maður í viðskiptalífinu. Aðeins hluti sögunnar gerist í fangelsinu en um er að ræða fjölskyldudrama með fókus á konur sem teigir anga sína víða um íslenskt samfélag. Allt ofan úr Alþingi og niður í áðurnefnt kvennafangelsi.

Það er framleiðslufyrirtækið Mystery Production í samvinnu við Vesturport og Rúv sem gerir þættina en þegar er búið að selja sýningarréttinn á þeim til DR í Danmörku, NRK í Noregi, SVT í Svíþjóð, YLE í Finnlandi og til Canal+ í Póllandi. RÚV sýnir þættina hér á landi eftir áramót.