Næstu fimm vikur verður fuglabjarg í sjónvarpinu

Nei, þetta er ekki frétt frá Alþingi um að þingmenn ætli að ræða um fundarstjórn forseta. Þetta er um nýjasta dagskrárlið norska ríkissjónvarpsins, NRK. 

Obama Bandaríkjaforseti grínaðist með það í veislu með leiðtogum Norðurlandanna í Hvíta húsinu í síðasta mánuði að Norðmenn skyldu hafa setið límdir við skjáinn yfir sjö tíma samfelldri útsendingu frá lestarferð milli Björgvinjar og Oslóar. Norska sjónvarpið toppaði það svo árið eftir með fimm daga beinni útsendingu allan sólarhringinn frá ferjusiglingu milli Björgvinjar og Kirkeness.

Ferjusiglingin sló í gegn og breyttist nánast i allsherjarþjóðhátíð sem milljónir manna fylgdust með. Hvar sem ferjan kom mætti mannhaf á bryggjurnar og þar var spilað, sungið og dansað.

Næst á dagskrá hjá NRK: Fuglabjarg í beinni útsendingu í fimm vikur.

Útsendingin hófst á netinu í gær en fer svo yfir á sjónvarpsrás NRK2 næstkomandi þriðjudag, 14. júní, sama dag og Ísland leikur fyrsta leik sinn á EM í knattspyrnu. Sent er beint út frá fuglabjargi á eynni Hornøya utan við Finnmörk í Norður-Noregi.

Þar er norska sjónvarpið búið að koma fyrir fimmtán fjarstýrðum myndavélum. Auk þess verða fljúgandi drónar og tvær myndavélar með mjög stórum aðdráttarlinsum til að fanga lífið í fuglabjarginu.

Aðstandendur telja að þetta verði spennandi sjónvarpsefni nú þegar varptíminn stendur yfir. Í bjarginu séu um 70 þúsund fuglar, þar á meðal lundi, rita, langvía, álka, teista, svartbakur, hrafn og skarfur. Áhorfendur geti fylgst með lífi og dauða í samfélagi sjófuglanna. Þeir sjái unga klekjast út, foreldrana færa þeim æti og berjast við að halda ránfuglum frá sem vilji næla sér í egg og unga. Og loks þegar ungarnir yfirgefa hreiðrið og taka fyrsta flugið. 

Hér má sjá beinu útsendinguna úr fuglabjarginu.