Formaður þjóðhátíðarnefndar undrast mikla öryggisgæslu

Formaður þjóðhátíðarnefndar Reykjavíkurborgar segist undrandi á þeirri ákvörðun lögreglu að stækka það svæði sem girt var af á Austurvelli í gær. Sýna þurfi einhverjum varúðarráðstöfunum skilning en nú sé þetta komið út í óþarflega mikla taugaveiklun.

Hátíðardagskrá við Austurvöll fór fram venju samkvæmt á 17. júní í gær en mikil öryggisgæsla var á svæðinu. Lögreglan hafði stækkað svæðið töluvert sem var girt af en það var gert í samstarfi við forsætisráðuneytið og Alþingi vegna mótmælanna sem voru við Austurvöll á þjóðhátíðardeginum í fyrra.

Birgir Örn Guðjónsson lögreglumaður birtir á Facebook síðu sinni mynd af eldri konu sem leitaði til hans á Austurvelli í gær. Hún hefði tekið þátt í hátíðarhöldum á Austurvelli á hverju ári í áratugi og alltaf staðið á sama stað. Nú hefði sá staður verið langt innan girðingar og því hefðu þau gefist upp og farið heim.

Undrast ákvörðun lögreglu

Þórgnýr Thorodd­sen, formaður Þjóðhátíðar­nefnd­ar Reykja­vík­ur­borg­ar, segist undrandi á þessari ákvörðun.

„Í fyrra var svo sem alveg eðlilegt að það hafi verið auka varúðarráðstafanir vegna boðaðra mótmæla en í ár var ekkert slíkt. Ég hefði nú persónulega viljað sjá fólki treyst fyrir þessu. Það var alveg greinilegt að grindverkin voru það langt frá að fólk átti erfitt með að sjá og heyra hvað var í gangi á vellinum, sem að mér finnst ekki í lagi,” segir Þórgnýr.

En hver tók þessa ákvörðun?

„Eins og ég skil það, þá er það lögreglan sem að tekur þessa ákvörðun. En lögreglan bendir á forsætisráðuneytið, forsætisráðuneytið bendir á lögregluna, við erum á milli steins og sleggju. Þannig að ég þori ekki að fara með hver tók þessa ákvörðun.”

Hann segist vilja sjá þetta fyrirkomulag endurskoðað fyrir næsta þjóðhátíðardag en Reykjavíkurborg hafi þó ekki ákvörðunarvald í þessum efnum.

„Ef við fórum bara tíu ár aftur í tímann að þá var þetta bara miklu rólegra og eins og ég segi, ég persónulega get alveg sýnt einhverjum varúðarráðstöfunum skilning en mér finnst þetta komið út í óþarflega mikla „paranoju“ ef ég á að vera alveg hreinskilinn,” segir Þórgnýr.