Rakel: Þetta er bara ofbeldi inni á vellinum | Myndband

Eins og fram kom á Vísi í gær brutust út slagsmál í leik Fylkis og ÍBV í Pepsi-deild kvenna á miðvikudaginn.

Fylkiskonan Rut Kristjánsdóttir og Eyjakonan Cloe Lacasse lentu þá í útistöðum og létu hnefana tala.

Dómari leiksins, Kristinn Friðrik Hrafnsson, virtist sjá atvikið en lét gult spjald á Rut og Cloe nægja.

Sjá einnig: Sjáðu öll mörkin úr 2. umferð Pepsi-deildar kvenna

Atvikið var tekið fyrir í Pepsi-mörkum kvenna í gærkvöldi þar sem Helena Ólafsdóttir og gestir hennar, Rakel Logadóttir og Þorkell Máni Pétursson, furðuðu sig á vinnubrögðum dómarans.

„Þetta á að vera rautt spjald á báðar. Þetta er bara ofbeldi inni á vellinum,“ sagði Rakel.

„Dómarinn horfir á þetta allan tímann en svo fer hann og leitar ráða hjá aðstoðardómaranum hvað hann eigi að gera,“ bætti Þorkell Máni við en hann vill að dómarinn verði tekinn á teppið fyrir þetta.

Innslagið í heild sinni má sjá hér að ofan.