Nauðgaði kærustu kunningja síns: Tveggja ára dómur staðfestur

Hæstiréttur hefur staðfest dóm Héraðsdóms Reykjavíkur frá því í mars í fyrra þegar Andri Karl Elínarson Ásgeirsson var dæmdur í tveggja ára fangelsi fyrir að nauðga konu á heimili hans í október 2013.

Andri bauð konunni og kærasta hennar heim til sín í kjölfar þess að hann hitti parið á skemmtistað en mennirnir tveir voru kunningjar. Þegar heim til hans var komið hafi þau fengið sér bjór, spjallað og horft á sjónvarpsþátt.

Konan kvaðst fyrir dómi ekki muna mikið eftir sjónvarpsþættinum því hún hafi verið orðin mjög þreytt og líklega sofnað. Kærastinn hennar og ákærði héldu áfram að spjalla saman en þegar að konan vaknaði vildi kærastinn að þau færu heim. Andri bauð þeim hins vegar að gista og sagði að þau gætu lagt sig í rúmið hans; hann myndi sofa á sófanum.  

Parið fór því inn í rúm en síðar um nóttina vaknaði konan við það að einhver lá bak við hana og hafði samfarir við hana. Hún sagðist ekki hafa kippt sér upp við þetta í fyrstu né sýnt mótþróa þar sem hún taldi að um kærasta sinn væri að ræða. Síðan hafi hún opnað augun og séð bak kærastans. Þá áttaði hún sig á hvað um var að vera. Kærastinn vaknaði líka og spratt upp en konan kvaðst fyrir dómi hafa farið út úr herberginu.

Kærastinn sagði fyrir dómi að hann hafi orðið var við óeðlilegar hreyfingar í rúminu en ekkert séð því niðamyrkur var í herberginu.  Hann tók í hönd kærustunnar sinnar og þreifaði frekar fyrir sér í rúminu. Þá áttaði hann sig á því Andri var einnig í rúminu og að hann væri „að taka brotaþola aftan frá“, eins og segir í dómi héraðsdóms frá því í fyrra.

Í þeim dómi kom jafnframt fram að framburður konunnar um hvað hafi gerst umrædda nótt sé trúverðugur auk þess sem gögn málsins hafi stutt hann.

Hið sama sé hins vegar ekki hægt að segja um framburð Andra sem viðurkenndi við fyrstu skýrslutöku hjá lögreglu að hafa haft samfarir við konuna, eða smá „pene“ eins og haft er eftir honum í dómnum. Átti hann þar við „penetration“. Hann breytti svo framburði sínum fyrir dómi og neitaði því að hafa haft samræði við konuna.

Dómurinn taldi því rétt að byggja á framburði konunnar og dæmdi Andra í fangelsi í tvö ár, en eins og áður segir hefur Hæstiréttur nú staðfest þann dóm.