Fótbolti

Ætluðu að framkvæma hryðjuverk á EM í Frakklandi

Eiríkur Stefán Ásgeirsson skrifar
Frá æfingu fyrr í þessum mánuði þar sem líkt var eftir hryðjuverkaárás á knattspyrnuleikvanginn í St. Etienne, þar sem Ísland mun spila á EM í sumar.
Frá æfingu fyrr í þessum mánuði þar sem líkt var eftir hryðjuverkaárás á knattspyrnuleikvanginn í St. Etienne, þar sem Ísland mun spila á EM í sumar. Vísir/Getty
Franska dagblaðið Liberation fullyrðir í dag að hryðjuverkamennirnir sem stóðu fyrir árásunum í París og Brussel hafi haft í hyggju að ráðast á Evrópumeistaramótið í knattspyrnu.

EM fer fram í tíu borgum í Frakklandi næsta sumar, frá 10. júní til 10. júlí, og er Ísland meðal þátttökuþjóða.

Mohamed Abrini, einn hryðjuverkamannanna sem er grunaður um að hafa staðið að voðaverkunum í París og Brussel, var handtekinn í Belgíu á föstudag. Samkvæmt frétt dagblaðsins mun hann hafa greint frá þessum áætlunum í yfirheyrslum.

„Það eru varla nýjar fréttir að hryðjuverkamenn hafi í hyggju að gera árás á meðan EM stendur,“ sagði ónefndur lögreglumaður í samtali við áðurnefnt dagblað.

„Öryggissveitirnar eru sífellt að kanna alla árásarmöguleika hryðjuverkamanna og hvernig á að bregðast við þeim.“

130 fórust í hryðjuverkunum í París í nóvember og 32 í Brussel fyrr á þessu ári. Hryðjuverkasamtökin ISIS lýstu ábyrgð á báðum árásunum.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.