178 mál stofnuð hjá ríkisskattstjóra upp úr leynigögnum

Embætti ríkisskattstjóra hefur stofnað alls 178 mál vegna vanframtalinna tekna upp úr leynigögnum um eignir Íslendinga í skattaskjólum sem skattyfirvöld keyptu í fyrra á 37 milljónir króna.

Þetta kom fram í máli Skúla Eggerts Þórðarsonar ríkisskattstjóra á opnum fundi efnahags- og viðskiptanefndar Alþingis í morgun. Skúli sat fyrir svörum á fundinum ásamt Bryndísi Kristjánsdóttur skattrannsóknarstjóra og embættismönnum. Bryndís sagði að embætti hennar hefði til rannsóknar 30 tilvik þar sem grunsemdir væru um skattundanskot.

Bryndís sagði í samtali við fréttastofu að af þeim málum sem væru til meðferðar hjá ríkisskattstjóra vegna vanframtalinna tekna væru einhver mál sem myndu líklega upplýsast með þeim hætti að ástæða væri til að vísa þeim til skattrannsóknarstjóra vegna gruns um skattundanskot. 

Skattalagabrot fyrnast á sex árum og því eru brot vegna tekna fyrir árið 2009 sem finnast í gögnunum að öllum líkindum fyrnd nema um sé að ræða stórfelld skattalagabrot sem varða við ákvæði hegningarlaga en á þeim er tíu ára fyrningarfrestur. Þá verða brot að vera samkynja eða hafa staðið yfir í langan tíma.

Fundur efnahags- og viðskiptanefndar er liður í sérstökum aðgerðum þingsins gegn skattaskjólum.