Stjórnarformaður RÚV hinn ánægðasti með nýju siðareglurnar

Nýjar siðareglur RÚV hafa verið til umfjöllunar að undanförnu og hefur Vísir greint frá harðri gagnrýni á þær, meðal annars teljast þær stangast á við tjáningarfrelsisákvæði stjórnarskrár auk þess sem mönnum finnst einkennilegt að starfsmönnum sé gert að klaga kollega sína telji þeir þá gerast sekir um brot gegn reglum.

Guðlaugur G. Sverrisson formaður stjórnar RÚV er hins vegar ánægður með nýjar siðareglur.

„Ég er ánægður með starfsmenn hafi sett sér siðareglur og haft um það góð og opin vinnubrögð. Ég er einnig ánægður með að heyra frá útvarpsstjóra að mikil og góð skoðanaskipti áttu sér stað á meðal starfsmanna RÚV er nefndin var að störfum. Mjög margar starfsstéttir og mörg félög á markaði setja sér siðareglur. Það er gert til þess að gæta hlutlægni í störfum sínum og sýna viðskiptavinum, viðmælendum eða umfjöllunarefni fyllsta heiðarleika og sanngirni. Ég tel að starfsfólk RÚV hafi náð vel utan um þessi markmið með nýju siðareglunum.“

Þörfin á nýjum siðareglum

Friðrik Þór Guðmundsson, sem á sæti í siðanefnd Blaðamannafélags Íslands og er sérfróður um siðareglur, segir nýjar siðareglur stangast á við siðareglur BÍ. Og hann spyr hvað það hafi verið sem kallaði á nýjar siðareglur?

„Það voru til fréttareglur fyrir fréttamenn RÚV. Aðrar siða- og samskiptareglur voru ekki til fyrir aðra starfsmenn félagsins. Nýjar siðareglur Ríkisútvarpsins ná til allra starfsmanna félagsins sem eru hátt í þrjúhundruð talsins enda segir í siðareglunum,“ segir Guðlaugur og vitnar í hinar nýju reglur: „Starfsfólk kappkostar að vera til fyrirmyndar um gæði og fagleg vinnubrögð, gegnir störfum sínum af metnaði, heiðarleika og virðingu og hefur í heiðri lýðræðislegar grundvallarreglur og mannréttindi.”

Siðareglur RÚV ekki einkamál RÚV-verja

Nýjar siðareglur geta þó tæplega talist einkamál RÚV, það hlýtur að varða samfélagið allt ef ríkisstofnun setur sér siðareglur sem hugsanlega stangast á við stjórnarskrá. Og, Guðlaugur fellst á það að nýjar siðareglur, þær hljóti að hafa áhrif á fjölmiðlun alla í landinu.

„Ég var eingöngu að benda á þá staðreynd að stjórn RÚV var látin fylgjast með starfi nefndar starfsmanna um setning siðareglna alveg frá byrjun og allt tal um annað er ekki satt,“ segir Guðlaugur og vísar til orða Marðar Árnasonar sem sagðist, í samtali við Vísi, hafa séð eftir því að hafa ekki kallað eftir drögum áður en siðareglurnar voru samþykktar.

Eftiráskýringar Bjargar Evu

„Eins langaði mig að vekja athygli á að skýringar Björgu Evu stangast á við áðurnefnt viðtal sem hún átti við Sigurlaugu Jónasdóttur að mig minnir í upphafi árs 2016,“ segir Guðlaugur – en hann vill meina að það hafi legið fyrir um þó nokkurn tíma að Björg Eva ætlaði að láta af stjórnarsetu. Það sagði hún í áðurnefndu viðtali, frá 6. janúar:

„Ég ætla að hætta núna, út af því - það er líka prinsippmál. Það voru mjög góðar breytingar sem átti að gera og voru gerðar en var snúið við með, að stjórnin væri ekki svona pólitísk. Og ef þær reglur giltu, þá væri ég nú orðin óhæf til þess að sitja í stjórn af því að ég orðinn flokkur og fulltrúi flokks meira en annað.“