Íslendingur í nautaati í Portúgal

Á meðan flestir Íslendingar tróðu sig út af páskaeggjum á Páskadag hafði Sigurður Ingibergur Björnsson öðrum hnöppum að hneppa. Sigurður steig á bak hesti í bænum Povóa St. Miguel - Moura í Portúgal og tók þátt í nautaati.

Nautaat í Portúgal er öðruvísi en þau sem flestir Íslendingar þekkja til frá Spáni. Í Portúgal berst nautabaninn við nautið á hestbaki en þar er nautið aðeins skutlað með krókörvum og ekki drepið. Nautið gerir tilraunir til að ráðast að bananum á baki sem hörfar og notast á móti við krókörvarnar.

Í spænsku nautaati er nautabaninn hins vegar með litríka dulu og reynir áður en yfir líkur að drepa nautið. Er slíkt nautaat þjóðaríþrótta Spánverja en gagnrýni á þá tegund ats virðist aukast frá ári til árs.

Snýst fyrst og fremst um reiðmennskuna

Sigurður er þrautreyndur knapi sem hefur verið í hestamennsku síðan hann var ungur. 

„Sem er náttúrulega langt síðan,“ segir Sigurður kíminn í samtali við Vísi. Sigurður er rétt skriðinn á sextugsaldurinn og fagnar 53 ára afmæli í ágúst. Fjallað var fyrst um nautaat Sigurðar í Morgunblaðinu í dag.

Sigurður hefur verið mikið á baki uppi á hálendi en auk þess kynnst hestum út um allan heim. Nefnir hann til sögunnar hindrunarstökk, dressage og ródeó í Chile.

Í portúgölsku nautaati er notast við svokallaða Lusitano hesta sem eru að sögn Sigurðar talsvert stærri en íslensku hestarnir og gríðarlega vel þjálfaðir.

„Ég kynntist þessu nautaati í gegnum portúgalska vini í fyrra og fór að skoða myndbönd,“ segir Sigurður en eitt slíkt má sjá hér að neðan.

„Það er fyrst og fremst reiðmennskan í þessu sem heillar.“

Hugmyndin kviknaði á Kili

Sigurður segist hafa verið í reiðtúr suður Kjöl í fyrra með fyrrnefndum Portúgölum þegar þeir sögðu honum frá þessari tegund nautaats. Eftir það hafi ekki verið aftur snúið. Undanfarnar sjö vikur hefur hann verið í stífu námskeiði ytra við undirbúning fyrir bardagann á páskadag.

„Þetta er þrælsnúið tæknilega en ég var vel undirbúinn svo þetta gekk samkvæmt plani,“ segir Sigurður

Hann var í læri í skóla Portúgalans Jorge D’Almeida sem Sigurður segir að sé afar reynslumikill í faginu. Hann hafi auk þess mjög góð samtök sem hafi hjálpað honum að komast að, að fá að berjast, sem sé talsvert mál.

„Hann er veteran í þessu og búinn með 1500 bardaga. Sonur hans, Antonio D'Almeida sem er atvinnumaður í þessu, kenndi mér mikið líka,“ segir Sigurður.

„Svo hjálpar að vera útlendingur líka. Þeim finnst það spennandi.“

Annar bardagi framundan

Sigurður er skráður í annan bardaga í Figurera da Foz þann 12. maí. Sigurður er spenntur fyrir bardaganum en viðurkennir að eiga langt í land í að komast eitthvað nálægt þeim bestu í faginu.

„Það er ekki raunhæft fyrir karl á sextugsaldri að byrja í þessu og ná langt,“ segir Sigurður léttur.

Hann bætir við til gamans að í elsta bókmenntaverki sögunnar, Gilgamesarkviðu sem var sennilega rituð 2100 fyrir Krist, er lýsing á nautaati.

„Þetta hefur verið með okkur síðan við urðum að mönnum og hættum að vera apar. Sá atburður var nefnilega þegar við fórum fyrst á hestbak,“ segir Sigurður.