Innlent

Hér eru vegirnir sem fá mestu peningana

Kristján Már Unnarsson skrifar

Mesta áherslan í vegagerð næstu þrjú ár verður á Vestfirði, samkvæmt samgönguáætlun 2015-2018, sem innanríkisráðherra hefur lagt fram á Alþingi. Suðausturland fær einnig umtalsverðar vegarbætur en nýr Dettifossvegur var hins vegar skorinn niður.

Staðan í vegamálum Vestfirðinga er raunar svo furðuleg að núna um páskana er lengra fyrir Bílddælinga að aka frá sunnanverðum Vestfjörðum og vestur á Ísafjörð á hátíðina Aldrei fór ég suður heldur en fyrir Reykvíkinga að aka alla leiðina vestur. Ástæðan er þetta náttúrulega járntjald um miðhluta Vestfjarða sem núna á loksins að fara að rjúfa, með Dýrafjarðargöngum, sem á að bjóða út fyrir áramót, og samhliða með því að byggja upp heilsársveg um Dynjandisheiði.

Séð að Dýrafjarðarbrú. Jarðgöngin verða grafin í gegnum fjallið handan brúar og yfir í Arnarfjörð. Mynd/Stöð 2.

Og það er önnur langþráð bylting boðuð á Vestfjörðum, leiðin um Gufudalssveit, sem á líka að bjóða út fyrir áramót. 

Suðvestanlands sjá menn einnig fram á langþráðar vegarbætur. Á Kjalarnesi á að fara í 2+1 veg að Hvalfjarðargöngum, það á að ljúka tvöföldum þjóðvegarins um Mosfellsbæ, í Ölfusi verður farið í 2+1 veg milli Hveragerðis og Selfoss, við Straumsvík verða Krísuvíkurgatnamótin gerð mislæg, Uxahryggjavegur verður malbikaður milli Borgarfjarðar og Þingvalla og sama verður gert við mikilvægan sveitaveg á Suðurlandi, Reykjaveg, sem er stysta leiðin milli Laugarvatns og Flúða. 

Frá þjóðveginum í botni Berufjarðar. Stöð 2/Friðrik Þór Halldórsson.

Á Austurlandi verður haldið áfram að malbika hringveginn um Skriðdal að Breiðdalsheiði, vegurinn um Berufjarðarbotn verður kláraður, ný brú verður loksins byggð á Hornafjarðarfljót, - enn ein byltingin sem styttir hringveginn um ellefu kílómetra,-  og svo kemur Morsárbrú í stað Skeiðarárbrúar, enda er Skeiðará ekki lengur til. Norðaustanlands verður lagt slitlag á Langanesströnd milli Bakkafjarðar og Þórshafnar.

En svo er það allt hitt sem ekki verður gert, og það eru örugglega vonbrigði víða. Dettifossvegur var til dæmis skorinn niður, aðeins nyrsti hlutinn milli Ásbyrgis og Hljóðakletta verður byggður upp en tengingin milli Ásbyrgis og Dettifoss frestast enn. Sömuleiðis var ný Jökulsárbrú á Fjöllum felld út, nýr vegur um Öxi komst ekki á blað og suðvestanlands verður ekki lokið við að tvöfalda Reykjanesbraut milli Hafnarfjarðar og Hvassahrauns. Þá verður ekki haldið áfram vinnu við Arnarnesveg í efri byggðum Kópavogs til að tengja hann við Breiðholtsbraut. 

Fjárveiting er til jarðfræðirannsókna vegna Seyðisfjarðarganga, sem eru skilaboð um að þau verði næst í röðinni á eftir Dýrafjarðargöngum.

Reykjanesbraut sunnan Hafnarfjarðar verður ekki tvöfölduð á næstu þremur árum, samkvæmt samgönguáætlun. Hins vegar verða byggð mislæg gatnamót á Reykjanesbraut við Krýsuvíkurveg í Hafnarfirði.

Tengdar fréttir

Ákall til Alþingis um Dýrafjarðargöng

Vestfirðingar safna nú undirskriftum undir ákall til stjórnvalda um að Dýrafjarðargöng fái forgang og fram fyrir Vaðlaheiðargöng og Norðfjarðargöng. Bíll komst yfir Hrafnseyrarheiði í dag í fyrsta sinn í fjóra mánuði. Ákall um Dýrafjarðargöng er yfirskriftin sem lýsir vel hve heitt samgöngumálin brenna á Vestfirðingum.

Hálfur Dettifossvegur verri en enginn

Ferðaþjónustuaðilar á norðausturhorni landsins óttast hrun, þegar bara hálfur Dettifossvegur verður opnaður meðfram Jökulsárgljúfrum næsta sumar, og segja að ferðamennirnir muni sleppa Ásbyrgi og byggðunum við norðurströndina.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.