Stærsti dagur kosningabaráttunnar

Hillary Clinton hefur afgerandi forystu meðal demókrata en Donald Trump meðal repúblikana í baráttunni um að verða forsetaefni flokkanna, samkvæmt nýrri skoðanakönnun sem fréttastöðin CNN birti í gær.

Skoðanakönnunin náði til allra ríkja Bandaríkjanna. Clinton mældist með 20 prósenta forskot á Sanders, en hjá repúblikönum mældist Trump með 49 prósenta fylgi, Marco Rubio með 16 prósent en aðrir minna.

Forkosningar og prófkjör flokkanna hófust í byrjun febrúar og standa allt fram í júnímánuð, en endanlega verða forsetaefni flokkanna valin á landsfundum þeirra í júlí.

Í dag er svo stærsti dagurinn í kosningabaráttunni, „ofurþriðjudagurinn“ svonefndi þar sem kosið er samtímis í fjórtán af 50 ríkjum Bandaríkjanna.

Eftir daginn í dag ætti staða frambjóðendanna að skýrast verulega, þótt enn sé nokkuð í land þangað til endanleg niðurstaða verður ljós.



Til þessa hefur sá frambjóðandi, sem á ofurþriðjudeginum hefur flesta sigra að baki, þótt nokkuð öruggur um að verða á endanum forsetaefni síns flokks.

Fimm repúblikanar eru eftir í baráttunni, af þeim sextán sem upphaflega ákváðu að taka þátt.

Auðkýfingurinn yfirlýsingaglaði Donald Trump hefur verið sigursælastur til þessa, þótt hann hafi engan veginn tryggt sér tilnefningu flokksins enn sem komið er.

Næst honum koma þeir Marco Rubio, sem er öldungadeildarþingmaður frá Flórída, og Ted Cruz, sem er öldungadeildarþingmaður frá Texas.

Ríkisstjórarnir Jeb Bush og Chris Christie eru báðir hættir, en Christie hefur lýst yfir stuðningi við Donald Trump.

Kasich hefur ekki verið sérlega sigursæll, en hann hefur nú lýst því yfir að ef hann tapar í Ohio, þar sem hann er ríkisstjóri, þá sé hann hættur. Forkosningar í Ohio verða þriðjudaginn 15. mars.

Sá fimmti er heilaskurðlæknirinn Ben Carsons, sem vakið hefur athygli fyrir ýmsar furðulegar yfirlýsingar, svo sem um að píramídarnir í Egyptalandi hafi upphaflega ekki verið grafhýsi heldur korngeymslur. Dagurinn í dag ræður líklega úrslitum um það, hvort hann haldi áfram.