Fyrrum unglingalandsliðsmaður Króata á miðju Fjölnismanna í sumar

Fjölnismenn hafa styrkt liðið sitt fyrir átökin í Pepsi-deildinni í sumar en Grafarvogsfélagið hefur samið við króatískan miðjumann. Þetta kemur fram í fréttatilkynningu frá Fjölni.

Igor Jugovic er 27 ára gamall og 178 sentímetrar á hæð en hann spilar vanalega sem afturliggjandi miðjumaður.

Jugovic á að baki hundrað leiki í króatísku deildinni fyrir lið NK Zagreb, NK Istra 1961 og Slaven Belupo Koprivnica.

Hann hefur einnig spilað fyrir lið NK Celje í Slóveníu og lið Sheriff Tiraspol í Moldavíu þar sem hann var síðast.

Igor Jugovic lék á sínum tíma 30 leiki fyrir yngri landslið Króata og var um tíma fyrirliði.

Þetta eru góðar fréttir fyrir Fjölnismenn sem hafa misst marga lykilmenn að undanförnu, Bergsveinn Ólafsson fór í FH, Kennie Chopart fór í KR og Aron Sigurðarson samdi við norska félagið Tromsö.

Fjölnir hefur svarað þessu með því að fá aftur til síns makedónska miðvörðinn Daniel Ivanovski og semja við danska sóknarmiðjumanninn Martin Lund Pedersen.