Fá rukkun fyrir að dreifa efni

Innan nokkurra vikna fá allt að eitt þúsund manns í Svíþjóð, sem dreifa höfundarvörðu efni ólöglega, kröfu um greiðslu upp á 2.000 sænskar krónur, eða 27 þúsund íslenskar krónur, fyrir hverja kvikmynd.

Nýtt fyrirtæki á vegum höfunda í skemmtanabransanum hefur afhjúpað hverjir eru á bak við fjölda IP-talna en þegar hafa nokkur þúsund verið afhjúpuð. Greiði þeir sem fengið hafa kröfubréfin verður ekki höfðað mál gegn þeim.

Þegar fram líða stundir verður farið fram á hærri greiðslur frá þeim sem dreifa efni ólöglega, að því er segir í frétt á vef Dagens Nyheter.

Fréttin birtist fyrst í Fréttablaðinu