Aftur í fangelsi vegna gruns um að hafa svipt tvær stúlkur frelsi sínu

Hæstiréttur hefur staðfest úrskurð Héraðsdóms Reykjavíkur þess efnis að maður sem grunaður er um að hafa frelsissvipt tvær stúlkur þann 27. júní síðastliðinn skuli sæta afplánun á 105 dögum á eftirstöðvum refsingar sem honum var veitt reynslulausn á í ágúst í fyrra.

Maðurinn er grunaður um að hafa í félagi við annan mann frelsissvipt stúlkurnar tvær á heimili annarrar þeirra síðastliðinn mánudag en fyrst var greint frá málinu í Fréttablaðinu í dag.

Í dómi héraðsdóms kemur fram að frumrannsókn lögreglu hafi leitt í ljós að málið tengist peningaskuld stúlknanna sem mennirnir hafi verið að innheimta en önnur stúlkan er kærasta annars mannsins sem einnig var kærður vegna málsins. Hann var hnepptur í gæsluvarðhald sem rennur út í dag en ekki verður farið fram á áframhaldandi gæsluvarðhald yfir honum samkvæmt upplýsingum frá lögreglu.  

Lýsingar í dómnum á frelsissviptingu eru heldur ófagrar en þar segir meðal annars að frelsissviptingin hafi staðið yfir í sex klukkustundir og eru eftirfarandi lýsingar hafðar eftir stúlkunum í greinargerð lögreglu:

„Kváðu þær að á meðan þeim hafi verið haldið hafi þeim og ættingjum þeirra verið hótað lífláti, klippt hafi verið í hár þeirra og borinn hnífur að hálsi A. Kvað hún Y hafa verið með miklar hótanir við B og einnig sett sleif ofan í háls hennar. Þá hafi þær borið um í skýrslutöku hjá lögreglu að kærði X hefði beitt töng með gulu skafti til að merja tá á B og einnig hefði hann beitt tönginni á putta á B svo á sá. Auk þess kváðu þær Y hafa troðið peysu upp í B til að heyrðist ekki í henni þegar tönginni hafi verið beitt. Loks kváðust þær hafa verið haldi inni í íbúðinni frá kl. 04:00 þar til um morguninn og hafi þeim þá verið hleypt út og þær farið á kaffihús í nágrenninu.“

Dóm Hæstaréttar má sjá hér.