Eru í viðræðum um hernaðarsamstarf

Bandaríkjamenn og Rússar hafa verið að semja um hernaðarsamstarf í Sýrlandi, sem myndi beinast gegn uppreisnarmönnum í borginni Aleppo.

Reuters fréttastofan skýrir frá þessu og vitnar í rússnesku fréttastofuna RIA, sem hefur þetta eftir rússneska varnarmálaráðherranum Sergei Shoigu.

Bandaríkjamenn hafa hins vegar til þessa stutt suma sýrlenska uppreisnarmenn gegn stjórnarhernum, nefnilega þá uppreisnarmenn sem segjast vera hófsamir, en Rússar hafa dyggilega stutt Sýrlandsstjórn gegn öllum uppreisnarmönnum, hvort sem þeir teljast hófsamir eða ekki.

Sergei Lavrov, utanríkisráðherra Rússlands, leggur hins vegar mikla áherslu á að hófsamir uppreisnarmenn slíti algerlega öll tengsl við hina, sem tengjast Al Kaída og öðrum hryðjuverkasamtökum: „Við teljum enn vera nauðsynlegt að leyfa engum alþjóðlegum hryðjuverkasamtökum að ná yfirhöndinni og tryggja að raunverulegar samningaviðræður hefjist milli allra sýrlenskra fylkinga,“ hefur rússneska fréttastofan TASS eftir honum.

Um helgina hitti Lavrov hinn þýska starfsbróður sinn, Frank-Walter Steinmeier, sem segir nauðsynlegt að koma á langvarandi vopnahléi í Aleppo. Hann vildi einnig koma á fót loftbrú, þar sem flogið yrði með fólk frá borginni til að koma því út af átakasvæðinu.

„Ég stend fast við það að þriggja tíma vopnahlé á dag dugar ekki,“ segir Steinmeier, samkvæmt frásögn þýska vikuritsins Die Zeit. „Ástandið á fólki í Aleppo er skelfilegt. Það getur ekki og má ekki halda svona áfram.“

Lavrov var samt ekki á sama máli. Hann telur enn að þriggja tíma vopnahlé á dag nægi, ásamt því að opna fjórar flóttaleiðir fyrir fólk svo það komist frá borginni landleiðina.

Þýska stjórnin sakar Rússa um að sýna íbúum Aleppo kaldlyndi. Stephen Seibbert, talsmaður stjórnarinnar, segir allt tal um þriggja tíma vopnahlé á dag, sem eigi að hljóma eins og verið sé að koma til móts við íbúana, sé í raun kaldranaleg afstaða: „Allir vita að þessi tími dugar engan veginn til að ná að sinna því fólki sem býr við algera örvæntingu.”