Hjúkrunarfræðingar gagnrýna McKinsey skýrsluna

Stjórn hjúkrunarráðs Landspítala lýsir yfir áhyggjum af litlu vægi hjúkrunar í ráðleggingum til úrbóta í heilbrigðiskerfinu í nýútkominni skýrslu sem unnin var af ráðgjafafyrirtækinu McKinsey fyrir velferðarráðuneytið. Kallað er eftir frekari rökstuðningi á ráðleggingum fyrirtækisins þess fjölga eigi sérfræðilæknum til þess að fækka legudögum og að þar með verði hægt að minnka þörf á hjúkrunarfræðingum.

Hjúkrunarráð bendir á í ályktun sinni að ýmsa þætti vanti í skýrsluna. Beri þar helst að nefna úttekt á yfirvinnu hjúkrunarfræðinga, hvaða áhrif yfirvinna og hvíldartímabrot hafi á öryggi sjúklinga og starfsmanna, gæði þjónustu, veikindi starfsfólks og hvíldartímaréttindi. Þá skorti úttekt á hvort unnin yfirvinna nægi til að minnka álag og halda nægum rúmafjölda opnum á Landspítala sem og samanburð á yfirvinnu á Landspítala við samanburðarsjúkrahúsin.

„Mikill skortur er á hjúkrunarfræðingum nú þegar og vanmat á þeim skorti er grafalvarlegt mál. Skýrsla McKinsey er langt frá því að greina frá mönnunarvanda hjúkrunar á Landspítala og víðar. Nýliðun hjúkrunarfræðinga er ekki í takt við aukna þörf fyrir hjúkrunarfræðinga, hvað þá þann atgervisflótta sem raun ber vitni og þann fjölda hjúkrunarfræðinga sem fara á eftirlaun á næstu árum. Brýn þörf er á aðgerðaráætlun til að bæta mönnun í hjúkrun nú og til framtíðar,“ segir í ályktun stjórnar hjúkrunarráðs.

Ályktunin í heild.