ÍBV fær danskan framherja

Eyjamenn eru búnir að styrkja liðið fyrir átökin í seinni hluta Pepsi-deildar karla í fótbolta en þeir sömdu í dag við danska framherjann.

Sá heitir Soren Skals Andreasen en þetta kemur fram í fréttatilkynningu frá Eyjamönnum. Daninn er tvítugur og hefur verið að æfa með ÍBV-liðinu undanfarna daga þar sem hann náði að heilla þjálfara og forráðamenn félagsins.

Andreasen er uppalinn hjá Esbjerg líkt og samlandi hans Mikkel Maigaard Jakobson sem samdi við ÍBV fyrir tímbilið.

Eyjamönnum hefur gengið illa að skora að undanförnu í deildinni en liðið er aðeins búið að setja ellefu mörk í fyrstu tíu umferðunum. ÍBV er í sjöunda sæti með þrettán stig eftir þrjú töp í röð.