Kennarar sestir niður með ríkissáttasemjara

Fundur samninganefndar Félags grunnskólakennara og samninganefndar Sambands íslenskra sveitarfélaga hófst í húsakynnum ríkissáttasemjara klukkan 13 í dag.

Fundurinn er sá annar í röðinni eftir að kennarar vísuðu kjaradeilu sinni við sveitarfélögin til sáttasemjara í liðinni viku, en fyrsti fundurinn var síðastliðinn mánudag.

Ólafur Loftsson, formaður Félags grunnskólakennara, sagði í samtali við Vísi í morgun að hann teldi að samningaviðræðurnar nú mættu í mesta lagi taka þrjár vikur en kennarar hafa tvívegis á árinu fellt kjarasamning. 

Mikil ólga er í stéttinni og komu um þúsund kennarar saman til samstöðufundar í Háskólabíó síðdegis í gær þar sem þeir kröfðust bættra kjara. Viðmælendur fréttastofu töldu eðlilegt að laun þeirra væru á bilinu 600-700 þúsund.