Totti kveður væntanlega í sumar

Meiðsli hafa farið illa með hinn 39 ára gamla Francesco Totti í vetur og gæti farið svo að þetta verði hans síðasta tímabil í boltanum.

Totti hefur verið frá í þrjá mánuði vegna meiðsla á læri og eiginkona hans hefur gefið í skyn að hann verði að hætta í sumar.

„Tíminn í boltanum er liðinn hjá honum. Hann verður fertugur á næsta ári. Hann hefur virkilega notið tímans í boltanum en ég held að hann sé farinn að hlakka til að gera eitthvað annað," sagði Ilary Blasi, eiginkona Totti.

„Ég er samt alveg viss um að hann verði eitthvað tengdur fótboltanum í framtíðinni.“

Totti verður klár í slaginn aftur fljótlega enda byrjaður að æfa á nýjan leik.

Hann hefur leikið allan sinn feril með Roma og byrjaði að spila með aðalliði félagsins árið 1992. Leikirnir eru að verða orðnir 600 og mörkin eru 244.