Eftirskjálftar viðhalda ótta

Snemma í gærmorgun kom harður eftirskjálfti, 4,7 stig að stærð, á hamfarasvæðinu á Mið-Ítalíu þar sem björgunarfólk hefur unnið hörðum höndum síðan á miðvikudag.

Skjálftinn á miðvikudag kostaði 268 manns lífið hið minnsta og 400 særðust að auki. Hundruð eftirskjálfta hafa torveldað björgunarstörf og viðhaldið ótta almennings á svæðinu.

Matteo Renzi forsætisráðherra lýsti í gær yfir neyðarástandi á þeim svæðum, sem verst urðu úti. Jafnframt hét hann því að ríkið muni verja 50 milljónum evra til enduruppbyggingar á svæðinu. Það jafnast á við ríflega 6,5 milljarða króna.

Ítalíustjórn hefur einnig ákveðið að fella niður skatta þeirra sem búa á svæðinu.

Ítalskir fjölmiðlar hafa harðlega gagnrýnt vinnubrögð við byggingar húsa, þar sem staðlar eru sagðir ófullkomnir og reglum auk þess ekki fylgt.

Fullyrt er að sum þeirra húsa, sem hrundu í jarðskjálftanum, hafi verið endurnýjuð fyrir skömmu.

Renzi forsætisráðherra svarar því til að það sé fáránlegt að halda að nokkurn tímann verði hægt að byggja hús á Ítalíu sem myndu standast alla jarðskjálfta.

Sérfræðingar telja að um 70 prósent húsa á Ítalíu standist ekki þær kröfur um jarðskjálftaþol sem gerðar eru í reglugerðum.

Síðan á miðvikudag hefur björgunarfólki tekist að bjarga rúmlega 200 manns á lífi úr rústunum. Ólíklegt þykir að fleiri muni finnast á lífi eftir svo langan tíma.

Fjórir bæir í Appennínafjöllunum urðu verst úti í skjálftanum: Amatrice, Accumoli, Arquata del Tronto og Pescara del Tronto. Þeir eru allir á litlu svæði um það bil 100 til 140 kílómetra norðaustur af Róm.

Flestir þeirra sem létust voru í Amatrice, alls 193. Þar í bæ búa um 2.500 manns.

Jarðskjálftar eru algengir á þessu svæði. Árið 2009 létu meira en 300 manns lífið í bænum L'Aquila, sem er skammt suður af upptökum skjálftans á miðvikudag.

Fréttin birtist fyrst í Fréttablaðinu.