Schalke hefur áhuga á Ragnari

Ragnar Sigurðsson segist hafa heyrt af áhuga þýska úrvalsdeildarliðsins Schalke á sér en fjölmörg félög hafa áhuga á íslenska landsliðsmanninum þessa dagana.

„Það er frábært að heyra af þessum áhuga Schalke. Við eigum ekki svo mikið af leikmönnum í stóru deildunum en vonandi breytist það eftir EM,“ sagði Ragnar við þýska blaðið Bild.

Ragnar fór á kostum með landsliðinu í Frakklandi og verður örugglega erfitt fyrir rússneska liðið Krasnodar að halda honum.

„Það myndi hjálpa íslenska liðinu að koma fleiri leikmönnum í stóru deildirnar og þýska deildin er svo sannarlega ein af þeim stærstu.“

Þjálfari Schalke þjálfaði Alfreð Finnbogason hjá Augsburg síðasta vetur og veit því hvað hann er að fá með íslenskum leikmönnum.