Sakfelldir fyrir að kaupa stolna olíu

Þrír karlmenn, einn fertugur og tveir á sextugsaldri, voru í Héraðsdómi Reykjaness í dag dæmdir í þrjátíu daga fangelsi fyrir hylmingu. Fullnustu refsinga mannanna er frestað og fellur niður að tveimur árum liðnum haldi þeir skilorð.

Mennirnir þrír voru sakfelldir fyrir að hafa keypt stolna olíu af tveimur mönnum og hafa verið fullljóst að um þýfi var að ræða. Sölumennirnir tveir stálu á níu mánaða tímabili olíu að verðmæti fimm milljónum króna frá Atlantsolíu.

Sjá einnig:Stálu bensíni fyrir rúmlega fimm milljónir króna

Fyrirkomulagið var ávallt hið sama. Mennirnir komu inn á verkstæði þar sem olían var geymd í tunnum. Fyrir hverja tunnu greiddu mennirnir 25.000 krónur í reiðufé. Hver tunna var tvöhundruð lítrar og lítrinn af olíu var á þessu tímabili á bilinu 238 krónur til 254 krónur.

Mennirnir báru því við fyrir dómi að þeir hefðu ekki vitað að um stolna olíu hefði verið að ræða heldur töldu þeir að þarna væri afgangsolía á ferð. Dómurinn féllst ekki á þann málflutning.

Sannað var að mennirnir höfðu keypt að minnsta kosti nítján tunnur af mönnunum. Einn sakborninga velti upp þeim möguleika að sölumennirnir væru að sjúga olíuna, að minnsta kosti 3.600 lítra, af bílum.

Í dómnum segir að það sé „almenn vitneskja að ekki gilda sömu markaðsaðstæður við kaup og sölu á dísilolíu hér á landi og almennt gildir um kaup og sölu á lausafé, meðal annars á þann hátt að óþekkt er að dísilolía sé boðin til sölu af öðrum en olíufélögum og í engum tilvikum á afslætti sem nemur hátt í 50% af útsöluverði.“ Því hefði mönnunum mátt vera fulljóst að um þýfi var að ræða.

Aðeins einn mannnanna hefur áður gerst brotlegur við lög en hann gekkst undir sektargerð vegna brota á tollalögum. Í ljósi þess, og hve lengi það dróst að gefa út ákæru í málinu, þótti unnt að skilorðsbinda refsingu mannanna.