„Þarna áttu sér stað átök. Það var ekkert launungarmál“

„Þarna áttu sér stað átök. Það var ekkert launungarmál,“ segir Gunnar Hilmarsson, aðalvarðstjóri á lögreglustöðinni á Grensásvegi, í samtali við Vísi um árásina sem Þórólfur Árnason, forstjóri Samgöngustofu, varð fyrir í Ármúla í gær.

Gunnar segir Þórólf ekki hafa lagt fram formlega kæru vegna málsins en að það verði gert. Hann segir árásarmanninn hafa verið handtekinn í gær og fluttan á lögreglustöð þar sem tekin var af honum skýrsla. „Í framhaldinu mun Þórólfur leggja fram kæru og svo fer þetta sína leið í kerfinu,“ segir Gunnar.

„Það var enginn ágreiningur um hvað hafði átt sér stað og hvort það voru þarna átök eða ekki. Þarna áttu sér stað átök, það var ekkert launungamál.“