Ólafur Karl: Skotarnir eru hrokafullir og dónalegir

Ólafur Karl Finsen, framherji Stjörnunnar, var vægast sagt ósáttur við framkomu Skotanna, bæði leikmanna og blaðamanna, í kringum leikinn gegn Celtic í forkeppni Meistaradeildarinnar í kvöld.

Celtic vann seinni leik liðanna í kvöld, 4-1, og einvígið samanlagt, 6-1, eftir 2-0 sigur í Skotlandi í fyrri leiknum.

„Mér fannst þeir hrokafullir og dónalegir,“ sagði svekktur Ólafur Karl Finsen í viðtali við Stöð 2 Sport eftir leikinn.

Skoskir blaðamenn gerðu lítið úr Samsung-vellinum í skrifum sínum fyrir leikinn og höfðu meiri áhuga á gervigrasinu heldur en leiknum sjálfum.

„Það er ekki okkur að kenna að við séum í þessari stöðu. Við erum bara að gera okkar besta,“ sagði Ólafur Karl eins einlægur og hann verður.

„Við mættum liðum eins og Inter í fyrra sem kom fram við okkur af miklu meiri virðingu. Maður fann bara hrokann leka af þeim, bæði í því sem skrifað var um okkur og sagt.“

„Þeir hefðu alveg getað verið jákvæðir og skemmtilegir. En ég er bara að segja það sem mér finnst,“ sagði Ólafur Karl Finsen.