Ræddi orku- og auðlindamál við Juncker

Sigmundur Davíð Gunnlaugsson forsætisráðherra segir að samstaða sé um það milli sín og Jeans Claude Juncker, forseta framkvæmdastjórnar Evrópusambandsins, að Ísland og Evrópusambandið geti byggt farsæl samskipti á grundvelli EES-samningsins og eflt hann. Þeir funduðu saman í Brussel í gær.

Sigmundur segir að þegar hann hitti Barroso, forvera Junckers, árið 2013 hafi Barroso eðlilega farið fram á það að þeir byrjuðu að ræða framtíðina í samskiptum Íslands og ESB. Fulltrúar Íslands myndu byrja á að gera grein fyrir afstöðu sinni til sambandsins og hvað yrði um aðildarumsóknina.

„Nú er loks búið að fá það á hreint og Evrópusambandið og Ísland á sömu síðu hvað það varðaði. Við gætum þá farið að byggja upp samband Íslands og ESB á þeim grunni,“ segir Sigmundur Davíð í samtali við Fréttablaðið.

Hann segir að þeir Juncker hafi rætt nokkur svið þar sem Ísland og ESB gætu átt samstarf. Þar hafi ekki síst borið á góma norðurslóðamál, þar sem Evrópusambandið sækist eftir áheyrnaraðild að norðurskautsráðinu.

„Við ræddum líka talsvert um sjávarútvegsmál, fiskveiðistjórnunarkerfið og orkumál.“

Sigmundur Davíð mun í dag ræða við Donald Tusk, forseta leiðtogaráðs Evrópusambandsins, en líka kynna sér starfsemi Eftirlitsstofnunar EFTA.