Vel heppnuð hátíð í Skagafirði

Tónlistarhátíðin Drangey Festival – þar sem vegurinn endar, var haldin í fyrsta sinn í Skagafirði um helgina. „Það má segja að frumraunin hafi gengið vonum framar, það gekk allt rosalega vel,“ segir Áskell Heiðar Ásgeirsson einn af skipuleggjendum hátíðarinnar. Þar komu fram Emiliana Torrini, Jónas Sigurðsson, Contalgen Funeral og Magni Ásgeirsson, en þess má til gamans geta að Áskell Heiðar skipuleggjandi og Magni eru bræður.

Ásamt Áskeli Heiðari standa þeir Guðbrandur Ægir Ásbjörnsson og Viggó Jónsson einnig á bak við hátíðina en hún fór fram á Reykjum á Reykjaströnd, skammt frá Sauðárkróki.

„Við höfum lengi pælt í gera eitthvað þessu líkt en hugmyndin um þennan stað fæddist seint í vetur. Við Guðbrandur Ægir höfum staðið á bak við Bræðsluna með Magna bróður og þekkjum þetta form því ágætlega,“ segir Áskell Heiðar. 

Nafn hátíðarinnar er dregið af staðsetningunni en hátíðin fór fram þar sem vegurinn endar á Reykjaströnd, í stórbrotinni náttúru þar sem Tindastóll, Grettislaug, Drangey og Atlantshafið mynduðu stórkostlega umgjörð.

Talið er að um 800 manns hafi sótt hátíðina. „Næsta spurning er hvort þetta sé komið til að vera. Það voru margir sem höfðu orð á því að þetta þyrftum við að gera aftur. Það var ákveðin stemning og ákveðnir töfrar sem við náðum upp, í líkingu við Bræðsluna. Það var mjög góður andi og góð stemning sem við vorum að leitast eftir og við náðum því. Þetta var ákveðin tilraun um hvernig tækist til og gekk rosalega vel í þessari ótrúlegu náttúrufegurð,“ útskýrir Áskell Heiðar alsæll með hátíðina.