Forstjóri svarar ekki spurningu

Friðrik Indriðason segist ósáttur við grein sem Gissur Pétursson, forstjóri Vinnumálastofnunar, skrifaði í Fréttablaðið í gær.

Segir Friðrik að í grein forstjórans sé ekki svarað spurningu hans um hvers vegna frítekjumark sé ekki reiknað með þegar atvinnuleysisbætur hans eru greiddar.

Í greininni sagði Gissur bæturnar þó rétt greiddar í samræmi við lög um atvinnuleysistryggingar.

Fréttablaðið sagði frá því á mánudag að Friðrik er með 784 krónum minna í ráðstöfunartekjur á mánuði í hálfu starfi auk skertra bóta en þegar hann var á fullum bótum.

„Ástæðan er að sögn Vinnumálastofnunar að stofnunin getur ekki reiknað frítekjumark mitt inn í dæmið. Þetta er spurningin sem forstjórinn svarar ekki í grein sinni en ég vildi gjarnan að hann gerði það,“ segir Friðrik.

„Eðlilega er hann bæði sár og reiður með þessa niðurstöðu og beinir henni gegn Vinnumálastofnun sem sér um útreikninga og greiðslu atvinnuleysisbóta,“ segir um fullyrðingu Friðriks í grein Gissurar.

Friðrik segist hafa fengið þau svör að bæturnar sem hann hafi fengið greiddar hafi verið svo lágar vegna þess að hann þarf að greiða til baka bætur sem hann fékk ofgreiddar frá stofnuninni.

„Ég tók tillit til þessa einstaka frádráttar við útreikninga mína og eftir stendur að um hver mánaðarmót mun ég fá 784 kr. minna í ráðstöfunarfé en ef ég væri á fullum bótum,“ segir Friðrik Indriðason.