Sextugsafmælis Kópavogsbæjar fagnað í dag með dúndrandi veislu í Kórnum

„Við hefðum þegið Timberlake-sviðið, þetta er enginn smá hópur sem kemur hér saman,“ segir Felix Bergsson, listrænn stjórnandi afmælistónleika Kópavogsbæjar, sem fram fara síðar í dag í Kórnum.

Í tilefni sextíu ára afmælisins hafa fjölmargir listamenn boðað komu sína, en þeir eiga það sameiginlegt að vera beintengdir við bæjarfélagið. „Við erum að tala um listamenn sem hafa búið hérna, búa hérna núna eða hafa sterkar rætur hingað.

Til dæmis má nefna Guðrúnu Gunnarsdóttir, Sölku Sól, Stefán Hilmarsson, Eyþór Inga, Siggu Beinteins, Dr. Gunna og Blaz Roca, Ríó Tríó og Gissur Pál Gissurarson. Verða um sex hundruð manns sem koma fram þennan sunnudaginn í Kórnum,“ útskýrir Felix og bætir við að sennilega sé hann sá eini sem ekki á rætur sínar að rekja til Kópavogs, „fyrir utan Sögu Garðarsdóttur auðvitað, en hún er núna orðin tengdadóttir Kópavogs. Hún mun verða kynnir ásamt tengdaföður sínum, Helga Péturssyni úr Ríó Tríói. Hún er Reykvíkingur í húð og hár, og mun rýna í samfélagið svona utan frá,“ segir Felix og skellir uppúr. 

„Þetta verður ein og hálf klukkustund sem verður undirlögð í brjálæðislega mikla sýningu. Það verður ekki dauð stund, ég ábyrgist það,“ tjáði Felix blaðamanni, en æfingar stóðu sem hæst þegar náðist í hann.

„Mikið hefur verið lagt í þetta og ekki snefill gefinn eftir. Það er nokkuð ljóst að reynslan af Timberlake-tónleikunum er að skila sér margfalt í þessu skipulagi hérna,“ útskýrir Felix og bætir við: „Hér gengur allt smurt, og ekki einu sinni prímadonnustælar í öllum þessum hæfileikabúntum hér.“