Niðurnítt gatnakerfi sagt vera dauðagildra

„Þetta er vissulega leiðigjarnt og veldur bílaeigendum tjóni en fyrir okkur er þetta orðið spurning um líf eða dauða að lenda illa í einhverri holunni. Þetta er okkur þess vegna verulegt áhyggjuefni,“ segir Hrönn Bjargar Harðardóttir, formaður Bifhjólasamtaka lýðveldisins, Sniglanna, um afleitt ástand gatnakerfisins sem mikið hefur verið til umræðu síðustu misseri.

Öryggismál bifhjólamanna voru rædd á árlegum fundi bifhjólafólks og Samgöngustofu nýlega. Þar voru öryggismál rædd almennt en sérstakar áhyggjur af ástandi vega, bæði innan- og utanbæjar, komu þar skýrt fram.

Hrönn segir að bifhjólafólk geti tekið undir allt sem sagt hefur verið um ástandið, ekki síst á höfuðborgarsvæðinu. Hrönn hefur sérstaklega á orði að allstór hópur sem ferðast um á litlum bifhjólum eða vespum er ungur að árum og með litla reynslu. En fleira kemur til.

„Það er líka mikið af lausu efni á götunum; sandur og möl,“ segir Hrönn. Hún hvetur til þess að ríki og sveitarfélög sem þurfa að sanda mikið yfir veturinn bregðist fljótt við þegar aðstæður gefa færi á hreinsunarstörfum eftir veturinn. Skilaboð hennar til þeirra sem ábyrgðina bera eru að spara ekki til þessara hluta, því þegar upp sé staðið geti það reynst allt of dýrt að kasta til höndum. „Sem hefur verið gert allt of lengi,“ segir Hrönn.

Einar Magnús Magnússon hjá Samgöngustofu, sem sjálfur hefur reynslu af vegakerfinu á bifhjóli, man ekki eftir ástandinu eins slæmu og tekur undir með Hrönn að hættan sem búin er hjólandi fólki þessa dagana sé veruleg.

Á fundinum var farið yfir slysatölfræði þungra bifhjóla fyrir árið 2014 þar sem kom fram að fjöldi slasaðra og látinna eykst lítillega milli ára. 

„Góðu fréttirnar eru að í fyrra varð ekkert banaslys en vondu fréttirnar eru að fjöldi alvarlega slasaðra eykst,“ segir Einar en tekur fram að erfitt sé að greina hvað liggur að baki. Mun fleiri hjól séu skráð á númerum núna samanborið við fyrri tímabil sem slysatölfræðin nær yfir.

„Líkurnar á að slys verði alvarlegt eru mjög miklar ef ökumaður er á þungu bifhjóli og því skiptir mjög miklu að aðstæður séu eins góðar og kostur er. Ef bifhjólamaður á þungu bifhjóli lendir í óhappi eru líkurnar á að afleiðingarnar verði alvarlegar um 40 prósent, borið saman við um 10 prósent verandi á bifreið,“ segir Einar.