112 greinir orsakir bilunar

Neyðarlínan ætlar að endurmeta viðbúnað 112 eftir það ástand sem ríkti síðastliðinn laugardag þegar 1.400 símtöl bárust vegna óveðursins. Þegar mest lét reyndu yfir 500 að hringja á sama tíma en á tímabili voru mörg dæmi þess að fólk fékk skilaboð úr símkerfinu þess efnis að númerið væri ekki í notkun.

Neyðarlínan segir í tilkynningu vegna málsins þetta vera röng skilaboð úr kerfum símafélaganna en um var að ræða að allar tengingar voru yfirfullar vegna álags. Vinna símafélögin nú að því í sameiningu að greina orsakir og að tryggja að ástandið endurtaki sig ekki.

Uppfært klukkan 13:45

Í fyrstu útgáfu fréttarinnar stóð að á tímabili hefðu verið mörg dæmi þess að símsvari Neyðarlínunnar segði: „Þetta númer er ekki til.“  Hið rétta er að um skilaboð frá símkerfi viðkomandi símafyrirtæki var að ræða. Enginn símsvari er hjá Neyðarlínunni.